فطيس

طفوا الفوانيس

لموا الكراريس

ولاعاد فيه عروسة

ولاعاد فيه عريس

الاقصى فى غمة

حيهدوه الرمة

ملعونة دى امة

ف كل النواميس

فى عددنا بنكتر

100 مليون واكتر

لكن مابنقدر

غير عالتهييس

وفلوسنا كتير

فى الهوا بتطير

لاميركى حقير

ويهودى خسيس

شاطرين نتسلح

على بعض بنفلح

ولغيرنا نشلح

واديها تفنيس

راحت حطين

وصلاح الدين

ولاعادش فى دين

عند الجواميس

قمة ورا قمة

لاعزيمة ولاهمة

وولاد الهرمة

شبعونا تجريس

معلش يا اقصى

اصل احنا بننسى

ونهاية القصة

حتروح فطيس

غصب عنى

من يوم ميلادى لحد ما موت

حفضل احبك

حفضل دايب فيك موت

واسكن قلبك

ومهما العمر عليا يفوت

حفضل جنبك

عايز اهلل عايز اغنى

عايز كل الناس تسمعنى

غصبن عنى

حبى ليك غصبن عنى

حبى ليك حيجننى

ان ماكانش خلاص جننى

شفت معاك فى عز الضهر

نجوم ونجوم

بحلم بيك قبل ماانام

بحلم بيك فى كل منام

بحلم بيك لما بقوم

ايه يجرى للاكلة الفخمة

لما تقع فى ايدين محروم

ايه يعمل واحدعريان

لما يلاقى هدوم بالكوم

بالتاكيد حيهلل

بالتاكيد حيغنى

وانا من يوم ماشفت عنيكى

عايز اهلل

عايز اغنى

عايزكل الناس تسمعنى

غصبن عنى

حبى ليكى غصبن عنى

حبى ليكى حيجننى

ان ماكانش خلاص جننى

ولا حاجه

نفسك فى 100 حاجة
وتجرى مهما تجرى
مش راح توصل لحاجة
وتعيش 100 سنة واكتر
برضو لاعشت ولا حاجة
ابنيلك بيت وهاتلك ارض
وارمح زى ماترمح
والله العظيم ولا حاجة
ولما يسألك الملاكين فى القبر
اخدت ايه معاك غير عملك
حترد يامسكين وتقول
ولا حاجة